OTSITIQUI
Coraamani, itiimaque mavite peacaantantanquitsica, apaaro inaaque Aapani Iriooshi, itsiipa iriiguenti quentiivacori.
Aapani Iriooshi
Iquenapoaaque antaaniqui otsirentajaaquegueti quentiija, isotojaatapoaque ishimpoquire-reaapoaque incantapoaqaue shimpooquirere¬rerere icatijaeencatapoaca tirooqui nigaanquija quentiijaqui.
Quentivacoori
Iponeaaca iriaatimpa antaaniqui omantsaretomantsaretoaatapojigueti quentiija, iquenapoaaque iriaatimpa ishimpo¬quirereaapoaque icatijaeencatapoaca tirooqui iriaatimpa itsipanaampitapojari Aapani Iriooshi.
Iriirari Iriooshi peacaacaroroca maaroni, icaantiri quentivacoori:
Irioishi: Intsijaa imaiica aviaatimpa quentivacoori pimpeacaaguempaja ipejaiiguetica.
Iriaatimpa quentivacoori incaanti:
Quentivacori: Intsicajaa picanquenaagueti imaiica aviaatimpa, aari nompeacaaquempa noniintaqueca naatipa ipeacajigueetaca.
Jeeri iquenanaaque imaiica iriaatimpa quentivacoori ipeacaaguentaca iniintaqueca iriaatimpa. Ipeaca¬acari ampaatsini, soopari, casoncatiini, inaamencha, cashivareeri, maseero, shegaamae iriisati maaronipae ampatsiniipae.
Imaiica yamenavaquero iriaatimpa Aapani Iriooshi tee oncameetsateji iveacaanepae iriaatimpa quentivacoori icaan¬tiri.
Aapani Iriooshi: imaica aviatimpa quentivacori iroguenti pipecaguetaca teeca oncametsateji, pipeacagueta¬nacari irirapae ampatsinipae. Imaica intsija pamenavaquenajaa naatimpa nompeacaguetaquem¬pagueti peacanetsipaje ipeacajiguetaca.
Jeeri iquenanaque iriatimpa irioshi impeacaquetacaro maasanopae timaguetanquintsica maasano quepatsiqui aisati maasano inquitequitica.
Ipeacacari ashivanti, saancaripae irashivantite irioshi, quepatsi, yapatojataquero maaroni nija, apajaro onajatanaque quentijaqui, iroguentiquea otsacororoncaatanaque nijapae opeaguetanaca ora nijatenipae aisati quejeguecaro ora ayenija, oquenaatashiguetanaca apatoajaguetanaca irosati quentijaqui. Aisati ipeacaguetacari maaroni pamacaviripea irisati tomirishisati, timancaroca que¬patsi.
Yagaguequerogueti maaronipae ipeacaguetacaro peaguetanquintsica quepatsiquitica, ari inajia-que aapani irioshi itsipatacari quentivacori. Irijojiaquequea peacajiacaroca maaroni timaguetan-quitsica quepatsiqui.
Aapani iroshi irio peacacaro oganecaguetanquitsica, iriraquea quentivacori irioquea peacaguecaro teeca oganeencatempaji.
Ocatica maaronipae peacaanentipae ari ocantajani irosati anaca ajagantsinini coraaamani, irioshi ari inaque iriatimpa yamenaguetaquero maaroni iveacanepaje iriaatimpa, iquenquejaque oshequi quero oncotaquempani maaroni iveacanepaje iriatimpa. Yamenamajaquero iriatimpa icanti.
Irioshi: imaica naatimpa oshequi noquenqueaqueca, namenaquero maaroni noveacanepaje, chooca aparo teeca nompeacaguempaji, namenavetaca naatimpa imaica maaroni nopeacagueta¬caro maaroni oganeencaguetanquitsica.
Iroshi: Imaicari imaica noquenqueaqueca iroguenti nompeacaquempa aparo ipeacaajiguetaca amenaquenaroneca maaroni ocatica nopeacaguetacaca, iriotaquequea ashintaquemparone iris-hecaguetaquemparo intsipajiaquempari maasano nopeacaguetacaca.
Oquejevaetanaca savincaguiteri irioshi ogantaga inquenquejiro quero onaqueni teeca impeaca-guempaji iriatimpa.
